---নিসঙ্গতা---

উৰুঙা বাটতোত
তেতিয়া কোনো নাছিল
জ্বলি আছিল
ধিমিক ধামাক
এটা অস্পষ্ট জোন ...

নিৰৱতাৰ কোলাত
ঢলি পৰাৰ আগতে
তাত মৰমে নাচিছিল,
বেদনাই কান্দিছিল,
ভোকত শুই পৰিছিল
এটা পাগল সপোন...

এতিয়া সকলো নিমাত
ক'লা ক'লা ছা'বোৰে
পোহৰৰ সতে
লুকা ভাকু
খেলিছে তাত..
মানুহৰ ৰিক্ত হৃদয়বোৰেও
উশাহ বিচাৰি
হাহাকাৰ কৰিছে...
বাট হেৰুৱাই
উচুপি আছে
অবুজ আবেগে ..

কিমান যে
অঁকৰা সিহঁত!
সিহঁতে কিয়
বুজি নাপায়
এই আলিবাটতোৰ দৰেই
বহি ৰয় সকলো
এদিন নিৰৱে
মৃত্যুৰ দৰেই
নিসঙ্গতাৰ সতে
সহবাস কৰো আমি
প্রতিপল ,অজানিতে ...

উৰুঙা বাটতোত
তেতিয়া কোনো নাছিল ..