----দৌৰ ----

এই আকাশ তোমাৰ 

এই সুৰুয তোমাৰ
তোমাৰ বাবেই বাট চাই
জিলমিল এজাক তৰাই ..

হেৰুওৱাৰ আশংকাত তুমি
উশাহ নোলোৱা ,
নোপোৱাৰ ভয়ত তুমি
বিচাৰি নুফুৰা
তোমাৰ বাবেই সজোৱা
জীৱন নামৰ সেই
ৰঙীন টোপোলা ..

কিহৰ চিন্তা
কিহৰ বান্ধোন ..
কিহৰ তাড়নাত আজি
ইমান কান্দোন ..
হাবিয়াসৰ ঘোৰাত উঠি
তুমি দৌৰিছা
মাথো দৌৰিছা ..
কিয় ইমান ভিৰ,
কিহৰ ইমান হতাশা!
মাথো উশাহৰ খেলা
এফালে জীৱন
আনফালে হুমুনিয়াহ ..

অকণমান ৰৈ
চোৱা আজি..
কাণপাতি শুনি
চোৱা আজি ..
এজাক চেঁচা বতাহ,
এখন নিয়ৰৰ আঁচল ..
শৰৎ আহিছে জানা ..
শেৱালী ফুলিছে চোৱা ..
আকাশত ওলমিছে
শুকুলা ডাৱৰ ...

কিয় ইমান ভিৰ,
কিহৰ ইমান হতাশা!
মাথো উশাহৰ খেলা
এফালে জীৱন
আনফালে হুমুনিয়াহ ..