Friday 1 August 2014

-- আশাৰ বৰষুণ --


অ'ই আশাৰ বৰষুণ 
তই আহিবি বুলি 
কিমান ওমলাম আৰু 
হতাশ দুচকুক .. 
মিছা প্রতিশ্রুতিবোৰ শুনিলে 
হৃদয়ে আজিকালি 
হাঁহি দিয়ে 
খিলখিলাই .. 

জীৱনৰ আউল
লগা অঙ্কবোৰে
আমাক বিধ্বস্ত
কৰিলে কেতিয়াবাই ..
এতিয়াও ভুল কৰো
এই অঙ্কবোৰ ..
আলু ,পিয়াজ আৰু প্রেম
য'ত সমান হয় ...
য'ত সেউজীয়া পথাৰবোৰক
বন্ধকত থৈ
মানুহে সজায়
কংক্রীটৰ দালান ..
য'ত মৰমৰ বৰষুণবোৰ
নিলাম দি
মানুহবোৰ ধনী হয়..
সেইবোৰ আমি
নোৱাৰিম শিকিব সহজে ..

তই ঘূৰাই দে
এবুকু মৰম,
তই ঘূৰাই দে
আস্থাৰ দুখনি হাত ..
ৰৈ আছো
তোৰ বাবেই ..

অ'ই আশাৰ বৰষুণ
তই আহিবি বুলি
কিমান ওমলাম আৰু
হতাশ দুচকুক ..
মিছা প্রতিশ্রুতিবোৰ শুনিলে
হৃদয়ে আজিকালি
হাঁহি দিয়ে
খিলখিলাই ..

No comments:

Post a Comment