কিমানদিনৰ পিছত

কিমানদিনৰ পিছত
লগ পালো অকলে
এখন মুকলি আকাশ ..
এজাক জোনাক সাৱতি
যি বহি আছিল
মোৰেই পদূলিত
এমোকোৰা হাঁহিৰে

কিমানদিনৰ পিছত যে
লগ পালো তাক
সম্পূৰ্ণ অকলে..
সেই একেই হাঁহি
সেই একেই আবেগ
বিলাইছে যে
আজি সি
ইমানবোৰ জোনাক
মনৰ হেপাহেৰে..

সলনি হোৱা নাই
তাৰ স্বভাৱ
ইমান আকুল
ইমান নিস্বাৰ্থ
যেন চিনি নাপাই
মানুহৰ জটিলতা
যেন চিনি নাপাই
কদৰ্য ঘাটকৰ
কলা হাতোৰা

আচলতে সি তেনেকুৱাই
নিজৰ উদাৰ হৃদয়ত
সঘনে কঢ়িয়াই
অজীৰ্ণ বেদনা
এমোকোৰা সৰল হাঁহিৰে
গোটেই নিশা চতিয়াই
শুভ্র পোহৰ
নিস্বাৰ্থ মৰমেৰে
এবুকু আবেগেৰে..

কিমানদিনৰ পিছত
লগ পালো অকলে
এখন মুকলি আকাশ ..